5 ऑक्टोबर आंतरराष्ट्रीय शिक्षक दिनानिमित्त रोटरी क्लब ऑफ कोल्हापूर मिडटाउनच्या वतीने कोल्हापूर शहरातील दहा विद्यार्थी प्रिय मान्यवर शिक्षकांचा सत्कार क्लबच्या अध्यक्षा सौ. अरुंधती महाडिक यांच्या हस्ते करण्यात आला.
आपल्या देशाची भावी पिढी सुसंस्कृत व ज्ञानी बनवण्याचे काम शिक्षकांकडून होत आहे. उच्च व तंत्रज्ञान शिक्षण घेतलेले विद्यार्थी हे विकसित राष्ट्राचा पाया असतात. या विद्यार्थ्यांना घडवण्यासाठी शिक्षकांचे योगदान महत्त्वपूर्ण आहे. अशा शिक्षकांचा सन्मान व आदर करणे हे आमचं कर्तव्य आहे. गुरुजनांप्रमाणे पालकांनी देखील आपल्या पाल्याची कर्तव्य व जबाबदारी पार पाडावी, असे मत सौ. महाडिक यांनी यावेळी व्यक्त केले.
प्रायव्हेट हायस्कूलचे सेवानिवृत्त शिक्षक प्रवचनकार दीपक भागवत सर यांच्या प्रमुख उपस्थितीत हा सन्मान सोहळा संपन्न झाला. या सोहळ्यामध्ये सौ. गीता कोरवी, संगीता जगदाळे, कल्पना जगदाळे, कुसुम पांढरबळे, वर्षा एजरे, सीमा खोत, रेश्मा आरवडे, महेश उपाध्ये, इंद्रजीत भोसले, मनोहर पवार या शिक्षकांचा सन्मान करण्यात आला.

---